牛禪燒肉日本料理 (Closed)

我哋幾個牛魔皇，特意約嚟呢度食刺身級嘅牛肉... 同行朋友有經驗，預先幾日前就打電話訂赤貝、赤座蝦及拖羅俾我哋食，實在太細心喇～三點前菜，合桃魚干仔甜甜脆脆好惹味... 明太子玉子燒啖啖明太子夾響軟綿綿嘅玉子入面... 七味魚翅味道似雞泡魚干，但食法完全不同～五品刺身有赤貝、赤座蝦、拖羅、帶子刺身、三文魚腩刺身，全部新鮮飛機貨～😋😋😋極上和牛盛宴，店員貼心話我哋知，燒一面至出血點點，就可轉另一面繼續燒，睇住半熟拎上嚟，入囗即溶，牛嘅香氣及油份渗滿口腔～日本南瓜、翠肉瓜、粟米、鮮冬菇椎茸，食得出件件新鮮～免治雞肉棒係原本我話唔好叫嘅一樣餸，事關食咗咁多年日本餐從未食過好食嘅雞肉棒，但朋友堅持點及推介，唯有尤得佢叫... 上枱後，朋友用肯定嘅眼神叫我食，我又即管食... 要多謝我呢個好朋友，佢真係冇介紹錯，賣相只係同一般雞肉棒一模一樣，但係食落嘅味道同埋質感，截然不同，呢個係我食過最好味嘅雞肉棒～番薯天婦羅，日本番薯🍠特別香甜、牛油蘆筍炒野菌，牛油香混和哂入每條蘆筍～同場仲有清酒放題，飲得大家非常盡興～