萬發海鮮菜館 (Closed)

端午節前夕嚟食晚飯梗係相當旺場，早一晚打電話嚟book位，話要8:30至有位。當晚我哋一行7個人未夠8:30去到，裏面坐滿，門口就企咗好多人。結果等到9:10至有位，不過佢哋樓面嚴重唔夠人，又等咗幾耐吓先至有伙計執檯同擺位。廚房又係唔夠人，等到9:45至有嘢食。講番食物，我哋叫咗：半隻霸王雞($65)、大魚頭煲($68)、蟹肉扒西蘭花、炸豬大腸、酥炸大鱔球同埋金沙海蝦(即係黃金蝦，伙計話：例牌$100)。啲嘢食樣樣都算係咁，分量亦唔細。我最欣賞大鱔球同埋金沙海蝦，前者有香脆嘅酥炸外層包住軟滑嘅鱔肉，後者好夠咸蛋黃，好過上次喺榮記食嗰碟(不過亦貴過榮記好多)。連埋兩枝嘉士伯(@$18)同5碗白飯，食得都好飽，埋單$459，都算經濟食得過。