人和月雞煲火鍋店 (Closed)

尖沙咀海防道呢間人和月雞煲火鍋店都係近年火鍋放題熱門之一，因為佢哋有首創嘅酥皮麻辣芝士雞煲，我正正就係因為佢而來嘅！火鍋放題基本有嘅飲品同火鍋配料佢哋都一應俱全，而佢哋嘅小食區有多款外邊放題比較少有嘅高質小食，有美極蒜香雞翼、野菌天婦羅、蒜香金沙骨、高原香酥肉同埋秘製清湯腩，等等。佢同其他火鍋放題都差唔多形式，可以有唔同嘅 grade 可以揀，我哋今次就揀咗 Set C 澳洲M4和牛海鮮大滿貫，每人$398喺尖沙咀來講都算幾抵食，有7個頭盤可以自選一款加一客海鮮盤同埋一客美國牛肉大滿貫，呢個餐入面最正嘅就梗係有澳洲M4和牛食啦！頭盤酥皮麻辣芝士雞煲外型似巨型酥皮湯，酥皮鬆化配埋麻辣芝士雞件一齊食都幾夾幾惹味。海鮮盤都幾豐富，入邊有扇貝、海蝦、鮑魚、青口同埋蜆。至於美國牛肉大滿貫有澳洲M4和牛、手切美國封門柳同埋極上安格斯牛小排各一客，另外仲有嚴選美國牛下肩、嚴選美國牛板腱、特級美國牛胸爽、精選美國金錢展同埋高級美國雪花肥牛任食！甜品方面除咗基本嘅雪糕方面，仲有台灣仙草凍同埋豆腐花，另外佢哋仲有好多水果配料例如紅豆、芋圓同埋地瓜圓等等俾你加落去一齊食。#人和月雞煲火鍋店📍尖沙咀海防道38