十三少 (Closed)

首先，我必須一讚，呢度嘅員工大部份都係後生仔，而且服務態度非常良好。嚟呢度，其實一般而言，我都係食酸菜魚同埋麻婆豆腐，因為四川菜來講嘅話，呢兩款菜，都算係幾標誌性。而又咁啱，我可以叫二人套餐，來滿足我呢兩個願望。二人套餐係$338 ，價錢上來講，唔會話好平，我覺得價位算係中上，但雖然話係二人套餐，但我覺得絕對係四個人食都足夠嘅份量。前菜係一碟酸辣嘅土豆絲，細細碟，用來做開胃菜嘅話，麻油味幾重，都可以開到胃。之後就係呢碟麻婆豆腐，麻婆豆腐上面有唔同嘅香料，包括胡椒粉、黑椒粉、麻油。所以調製得非常香，加上豆腐好硬身，麻婆豆腐醬完全滲入晒喺裏面，有好香嘅麻辣味，攞嚟送飯嘅話非常一流。到最後就係呢一碟酸菜魚，非常之大，我特別好欣賞佢呢度嘅魚肉，片得非常簿身，咁樣可以令到湯汁充分融入晒喺裏面；聽到嘅店員亦都特別提醒我，飲湯都係其中一個重要嘅環節。湯味酸中帶香，微辣，亦都有少少嘅清甜味，總括而言我對呢餐感到非常滿意。