醉藥雞 (福榮街)

Open Now

Now Closed

今日下晝去咗深水埗既醉藥雞，諗住食返個雞湯米線暖下胃。午餐時段好彩唔使排隊，餐廳入面位置不多同座位較迫，想食記得預早少少黎。呢度最出名係砂鍋生滾麵，有翅、雲吞、胡椒豬肚各類選擇搭配雞件同砂鍋原煲上，可以保持住雞湯同麵底夠熱，另外都仲有冷盤同涼拌麵等。今次嗌咗砂鍋雞湯翅、砂鍋胡椒豬肚雞同醉乳鴿。湯底方面，店家聲稱係無添加味精，飲落雞味好濃郁，可以飲多兩啖。胡椒豬肚雞湯就好香好啱配麵食，胡椒既辣味唔會太搶，豬肚都夠淋，我自己就比較鍾意胡椒豬肚湯底，層次會豐富啲。雞肉方面兩鍋都係跟雞胸同翼既位置，肉質都算嫩滑。麵底可以揀米線、米粉、粉絲、刀削麵、白飯、銀針粉、賴粉，選擇多到暈，今次就揀咗有口感既刀削麵。最有驚喜係佢個醉乳鴿，酒味好香好香，入口乳鴿個肉質好軟好滑，好似食肝甘，非常推介。