California Pizza Kitchen (Closed)

捉完急凍鳥要搵嘢食醫肚，就兩條友走咗上 Megabox 搵嘢食。行過見到呢間鋪頭有 set dinner，食物選擇都算唔錯，就決定入去試吓啦。二人套餐係可以選擇一樣前菜、一款意粉同埋一款薄餅，於是我哋就叫咗牛油果蛋卷、香辣海鮮意粉同埋辣肉腸薄餅。由於入去嘅時間都算早，有客嘅枱唔算太多，所以啲嘢食都好快就嚟到喇。牛油果蛋卷入面嘅牛油果唔算多，反而有好多肉類嘅填充物，而且上菜嘅時候油味都幾重下。作為前菜嚟講佢嘅份量都唔算細，每人兩件都幾飽吓。兩種醬料配搭起嚟味道效果相差唔大。至於香辣海鮮意粉，其實除咗蝦之外，都混雜左唔少嘅肉類；香草味同辣味算係基本，就算唔食得辣都唔會有好大問題。薄餅都係少辣，餅邊算脆，但靠中間地方焗得唔夠乾，有少少似包嘅感覺多啲。雖然兩道主食主打香辣，但食落去其實鹹味比較重，甚至可以話幾重口味。好在餐飲嘅檸茶同汽水係無限添飲。以二人餐份量嚟講，其實都幾多下，我地兩位年青男士都食唔晒，如果追求份量，呢間鋪都幾抵幫襯；八點食完，飽到半夜都仲有感覺。員工服務態度幾好，好快會幫你清走啲盤（份量大，啲盤都好大，都幾阻掟），而且員工見到嘢飲見底會主動問你要唔要添飲。