Turkish Kebab & Indian Restaurant (Closed)

心痕痕想食印度菜，最好就梗係轉過彎喺尖沙咀重慶大廈到搵嘢食啦！喺地下兜咗個圈就發現左呢間鋪仔細細但係幾有風味嘅餐廳，諗都唔諗就中入去睇吓啦！佢係做土耳其菜加印度菜嘅，有選擇困難症嘅我實在諗唔到叫啲乜嘢，呢個時候二人餐就幫到手啦！首先嚟嘅係芒果奶昔，口感好幼滑之餘仲有好濃郁嘅芒果味！幾好喎！之後上咗個前菜，係我去親印度餐廳都好鍾意食嘅脆脆薄片，已經開始肚餓嘅我就梗係食咗先啦！咖喱角就食得多，印度版本你試過未？佢個口感唔似我哋平時食開個隻春卷皮，反而有少少似食酥皮嘅感覺！層次都幾豐富，相信都落咗好多特色嘅香料！鐵板烤雞新鮮熱辣上碟！唔會過燶之餘啲雞都好滑！最後上菜嘅係雙色咖喱飯，最初都有少少擔心會唔會好辣因為朋友唔係好食辣，不過食落口發現，一啲都唔辣之餘仲好香口！買單先至二百幾蚊，性價比又幾高喎！