Foodie 泰式煎餅

Open Now

Now Closed

明日復明日，計吓條數已經年幾兩年冇飛過，身上面嘅旅行日子已經開始蠢蠢欲動，唯有周圍搵啲好嘢食止下癢。最近見到好多朋友仔都食泰式香蕉煎餅，不過都係圍繞新界地區，路程真係好遠，好彩最近比我發掘到有一間喺九龍市區，仲要喺正旺角心臟地帶，咁就梗係去試吓啦！去到店舖好細小，裝修都唔係好華麗，而且不設座位，不過佢嘅Menu同埋相片都好吸引，即刻叫咗個Nutella香蕉煎餅，另外叫咗杯泰式奶茶試吓。店家主張即叫即製，所以都要等大概五至十分鐘先有得食，但係我覺得呢個等待係值得㗎！Nutella香蕉煎餅一拎上手熱辣辣，而且Nutella醬料搽到勁厚而且均勻，每一口都會食到香甜嘅香蕉真係超正，份量都唔錯兩個人share食啱啱好。泰式奶茶我覺得係驚喜之作，店舖喺餐牌有標明奶茶嘅冰都係用茶去製作，佢嘅奶茶一入口非常之滑，入口唔會太甜，而且我覺得還原到80%泰國飲到嘅泰式奶茶嘅味道，比上兩個街口嘅泰式奶茶手搖店更加有泰國嘅風味，大家如果經過嘅話記得唔好錯過啊！