冠華粥麵

Open Now

Now Closed

以前係石圍角讀書時，lunch 會黎食碗牛雜米，又平又夠飽，最重要係好味，冇諗過隔左十幾年間舖仲係度，裝修依舊，老闆仲係那個四眼叔叔。當然價錢比起十年前加左唔少，但我都深明通漲嘅影響。今次黎到叫左碗牛筋米粉，碗面一上，依舊係好香嘅牛味但又唔會太穌，一見到碗麵回憶返哂黎，先飲一飲啖湯底，同十年前一樣，都係用牛慢慢煮出黎嘅湯底，但個米粉就唔再係以前白雪雪比較硬身嘅米粉，變為較為半透明軟身少少係屋企會煮嘅米粉。牛筋大約有5舊，軟硬適中嘅牛筋十分入味，每啖都有好香嘅腩汁味，再加入佢地自家嘅辣椒油！正！佢地嘅辣椒油係十分辣，我通常落一匙就已經夠，除左夠辣仲夠香，唔會係一味得陣辣味。呢間店舖已經成為好多人嘅回憶亦都係好多中年男士嘅聚腳點，眼見佢地會大家各坐一檯，叫左2-3支啤酒食住牛雜睇住電視吹下水或睇下跑馬，開開心心咁就過一日，呢種咁有情懷嘅小店，依家賣少見少我地應該要更加珍惜。