億饍 (Closed)

雖然遲左兩日，不過都要趁呢個熱潮同老友一齊屠龍，今日約埋老友兩個人收工到信和一齊攞之前訂左嘅GAME順便買埋呢期熱爆嘅GAME，之後一齊行去油麻地搵食，經過譽發廣場時睇到呢度開左一間多國嘅FUSION菜店，除左有老友好鍾意食嘅越南菜式外，仲有我最愛嘅龍蝦食，所以我地就決定去呢間億饍刷返餐。億饍係譽發廣場4樓 ，餐廳裝修嘅有西餐廳感覺，桌椅又似中式私房菜館，餐廳唔大間，我地7點半左右到雖然唔駛等位，不過客人都幾多。菜單設計簡約，但菜式選擇非常多，除左東南亞菜式、中菜，另外仲有燉湯選擇。我地點左$328嘅龍蝦孖寶，跟餐揀左咖哩牛筋腩，兩個人應該夠食，不過見到隔離枱嘅蝦餅好吸引，我地都忌唔住點左一份。泰式鮮炸蝦餅($68)呢個炸蝦餅好彈牙，而且外層香脆，沾上泰式辣醬非常惹味，而且$68咁大份，性價比都幾高。龍蝦孖寶($328)避風塘野生辣龍蝦野生龍蝦我地揀左少辣，配合避風塘製法，咸香之中帶點微辣，非常美味，而且野生龍蝦特別有彈性，入口鮮甜爽彈，我地兩個都食得好滋味。咖哩牛筋腩煲牛筋份量好多，咖哩唔會太辣，配油飯食味道好配。油飯($18)埋單每位$230，價錢合理。