金記冰室 (屯門時代廣場北翼) (Closed)

忙左成朝去到下午餐時間先得閒食飯，去左金記冰室食，下午時段都唔少人喎，大概八成滿左右，好彩都唔使等位。揀左張卡位坐，居然有得斟水幾特別，而且落單用qr code，一間新款嘅茶餐廳喎。朋友點嘅鐵板餐有個湯送，揀左西湯羅宋湯，幾足料，酸酸地帶蔬菜味，好飲吖。鐵板西冷配薯菜同燒汁，上枱時熱辣辣幾香喎。塊扒點左七成熟但都幾乎熟晒，哈哈，茶餐廳係咁上下啦。塊扒唔算太多鬆肉粉，都軟腍嘅，有牛味亦重黑椒味，大大塊幾抵食。薯菜份量多，勁多薯條，其他有西蘭花，粟米同三色豆，仲有啲洋蔥墊底。自己就點左口水雞套餐，個餐包中湯同白飯。雞件嫩滑，雞皮下唔肥膩喎，個口水辣汁好好味，辣度啱啱好，撈飯超正。例湯同白飯正正常常啦，夠熱無投訴。另外仲加左下午茶餐，因為淨加杯凍飲都廿幾蚊，加份餐仲抵嘛。芝士西多士真係好邪惡呀～麵包炸得香口，中間夾住半瀜芝士，熱力又瀜埋塊牛油，再淋埋糖漿好味到暈。仲有炸魚沙律，魚柳大大塊炸得香脆，沙律係雜果薯仔沙律，調味酸酸甜甜好味。飲品要左凍檸茶走甜，茶底香又夠凍。qr code落單清楚易用，自己㩒唔怕落錯單啦。