川味美食

Open Now

Now Closed

我冇諗過一食完個外賣要俾劣評，心裡面滿哂粗口！今日真係好想食粗薯粉，用app叫外賣。之前買過最高辣度係大辣都覺得唔夠辣，見到大辣後面有麻辣，揀左呢個，落左單。去到舖頭等外賣，阿姐話未收到panda嗰邊嘅order，唔緊要，我等陣啦，其間問左問阿姐，大辣同麻辣邊一個辣啲？阿姐話唔知，因為佢唔食得辣，佢少少都覺得辣，然後兩個人喺度唱雙簧。到佢收到我張order，佢問我，你唔係想食辣啲咩？你落單要左麻辣喎！我話係呀，我係落左麻辣。阿姐即刻起哂鋼，質問我：咁你又話大辣唔夠，但你落麻辣我地只會做麻辣小辣架咋！我聽到呢番說話即刻著燈！我咪話：Panda得大中小辣同麻辣，我唔知你地有咁樣分喎！我話你照做麻小辣啦。阿姐即刻卸膊，話呢個係app問題，唔關佢事！ok我當真係唔關你事唔熟個apps嘅item，但唔使咁樣佢一言你一句，兩個阿姐喺度自辨。我話，咁個apps得呢幾個choice，我唔知咪問你地囉！唔使拗。其實已經幫襯左幾次，之前我都唔知呢度啲人態度差到咁！睇到最近出嘅食評都係劣，原因係態度。已經冇服務架啦，連對答都衰到咁！深水埗區有啲餐廳老闆同職員係好有性格，但呢間舖嘅員工唔係有性格，係真心衰格！