第一蠔粉麵 (Closed)

老公同我都鐘意食蠔，今日專程嚟試下呢間主打食蠔嘅餐廳。舖面好細，只係坐到十個人左右。我哋兩個人坐長枱同人搭枱都唔係話好逼，旁邊仲有張櫈擺下袋，但隔離枱一行四人，個個身形都唔嬌少，就顯得有啲逼喇。坐喺度可以望到廚房，感覺都幾乾淨。Menu選擇唔多，除咗各種大小鮮蠔金蠔，仲有幾款大路嘢。價位就真係一啲都唔算經濟，不過想食蠔真係唔係度度有得食，唔太貴都可接受。唔洗等好耐就有得食，呢個所謂炸四寶丸呢。。。食唔出佢點樣炸過，味道都好一般，無乜特別。然後就係呢個每枱必點嘅炸蠔餅，落單之後聽到伙記叫廚房即炸。比想像中要細碟，已經幫你分咗四份。香脆蠔餅果然係好香脆，脆得嚟個感覺又唔會好heavy好熱氣，比起一般蠔餅佢無咁多粉，出嚟唔會好硬，又唔會淨係食到炸麵粉。蠔嘅數量目測唔算好多，但食落蠔嘅鮮味好豐富，啖啖都食到有蠔咁。最後係金蠔湯米線，一碗有五隻小金蠔。講真個湯底同米線真係好一般，清湯底可以話一啲味都無，即使有乍菜香菜都幫佢唔到。不過個金蠔的確唔錯，蠔味夠濃，個皮煎到香香地脆脆地，咬落𥚃面又好多汁，而且一啲都唔腥。招牌食蠔一啲都無失禮，下次蠔癮起會再嚟。