翠園 (銅鑼灣廣場) (Closed)

呢間係代替興利中心美心，所以大部份員工都熟口熟面，環境靚左好多。第一日開張，穿dark suit的高層、高高層都係度行來行去…服務升晒班，經理四圍派卡片，飲個午茶都幫客人外套上笠上椅套。幾得意的係，三間翠園，呢間係唯一一間推車仔，點心阿姐見到咁多高層係度，遞點心都有D手震。叫左百花釀魚肚、珍珠雞、粉果、腸粉，點心都係美心的穩定高質素，仲有久違了的芝麻卷，懷舊一番！經理仲主動拎晒午市、晚市餐牌介紹俾客人，選擇唔算多，不過推介左懷舊的燒味金錢雞，一於試試。上檯的時候仲暖暖地，叉燒、雞肝同冰肉都切得好薄，但都好大塊，塊雞肝外面仲有少少脆，裏面唔會硬實實，恰到好處，比得龍、蓮香做得好睇好食！另外點左個上湯海蝦煎麵，賣相好靚，行過的點心阿姐都係第一次見呢款麵，都大讚好靚。不過份量唔多，分成六小舊，似小吃多過主食，好彩味道唔錯，係個麵齋少少。