奈良上釜 (Closed)

唔介意得罪講句，其實呢間初初開果陣我唔係太睇好，雖然釜飯專門店響香港好少見，但普通款式都同魚生飯差唔多甚至再貴啲，其實都幾唔吸引，但今次食落又覺得唔錯。佢主餐牌有分基本單餸同多餸版，兩者價錢都差唔少，但多餸版除咗餸料多幾款之外，仲會有埋刺身煮物同生果，前兩者質素都唔差的。至於兩者都有嘅前菜中，最注目一定係個茶碗蒸，呢個蒸蛋都算大手筆，有蟹肉三文魚籽同黑松露，三樣取材個味都強烈，困住入個蒸蛋度個味變到好複雜下，唔係唔好味，但真係好複雜😌至於主角釜飯其實透過廚房個大窗都可以見到哂佢點整，白米加湯再直接燒個釜咁煲熟啲飯，因為用湯而唔係用水煲，所以個飯都幾香，而且有啲啲飯焦，鐘意食煲仔飯嘅應該都會愛上呢個日式煲仔飯。餸料全部都幾高質，蟹肉好甜鰻魚又好滑，唔錯，而且見佢好似細細煲但個底其實好深，食得都好飽下。