Hungry Korean (渣甸中心)

Open Now

Now Closed

逢星期三晚我都會喺銅鑼灣上興趣班，六點幾上堂，放學差不多十點，上堂前食左少少野，放學緊係要食野填下肚啦！喺銅鑼灣好多舖頭都開到十一點幾十二點，想食韓國野，又想快快趣食餐，食Hungry Korean就最好不過！價錢唔貴，而且食物真係幾好食，CP值都幾高！本身想叫韓國壽司，但十點幾先到已經賣晒嚕，所以叫左其他。韓國餃子💰HKD32有餃子五隻，每一隻都新鮮熱辣脆卜卜！餃子唔會煎得太乾，雖然唔係話皮薄餡靚，個配上小辣嘅辣醬，不失為一個幾好嘅小食。鐵板辣豬肉配飯💰HKD50以HKD50黎講，呢個飯算係物超所值。個汁有少少辣，但唔會辣到食唔到，用黎送飯非常好。椰菜都幾爽脆，而豬肉份量都算幾多，雖然比較油膩，但係配飯食就唔會有呢個問題。加HKD10就有一杯野飲。甜辣雞翼💰HKD34嘩啲雞翼好細隻，而且得4隻，好唔扺。雖然佢話甜辣，但辣味比較重，比鐵板豬肉辣啲，雞翼外層有煎過，有少少脆身，但肉質一般，加上份量太少, size偏細，完全唔值。總結，銅鑼灣食野出名貴，但係呢到50-60蚊就有交易，質素都幾好（除左雞翼），想食快餐呢到都不失為一個好選擇。