華倫餐廳 (Closed)

每星期到銅鑼灣一次，每次午飯時段都幾頭痕。。。（幾時都咁多人！） 今個星期我地去左試新野！華倫餐廳開業都有一段日子，次次經過入面都坐滿人，相信質素都幾好！一於試試啦～今日雖然係門口都有人等，但好快就有位，經理好好服務仲特意向我地推介左佢地餐廳有咩好食添！足料老火湯！有一點點家的味道～燒鵝叉燒飯瘦叉，一點肥肉都冇，岩晒怕肥既我。燒鵝亦都係冇咩肥膏！而個酸梅醬完全係將個燒鵝好味既層次再度升華。咸蛋四寶飯，佢既切雞十分嫩滑，值得一試！南瓜薯餅配雞亦雞亦炸得金黃通透，唔會有好厚炸粉，而味道只是微咸，唔會好似其他餐廳咁用濃烈既醃料蓋過佢既唔新鮮。而呢個南瓜薯餅，真係值得再encore! 外面炸得酥脆，內裡軟林林既就係南瓜同薯仔，亦都係冇用大量調味料，正！不得不讚呢度既奶茶！無論熱同凍，口感都好幼滑，仲有好香濃既奶味，奶同茶既比例十分好！呢度原來有即磨既芝麻糊，食落有十分香濃既黑芝麻味！而佢地既海帶綠豆沙亦都十分足料，經理話加左生薑落去煲，女仔食左都唔怕涼呀！