燒肉酒場 (Closed)

除咗牛肉之外，我都好鍾意食羊肉，鍾意嗰種香香嘅羊羶味🐏最近去咗燒肉酒場，呢度主打成吉思汗燒肉，以羊為主，夠晒特別。地點就喺銅鑼灣永光中心，喺地鐵站過去都唔使5分鐘，好方便。裝修好有地道和風燒肉店特色，抽氣做得好好，無乜油煙味👍🏻今次叫咗幾款唔同嘅肉，主打嘅羊我地就揀咗澳洲羊腹肉，有驚喜🤤羶味濃肉，又夠juicy!另外叫咗有五款牛肉嘅和牛盛盒，啱晒心大心細嘅人唔使慢慢揀，可以一次過試到五種！西冷油脂平均，味道香濃。牛背峰好有肉汁，三角胸小排相對就較有嚼勁，和牛肩反而比想像中軟嫩，肉眼就最出色，軟稔得嚟帶油香，配埋醬油同蛋汁一齊食更正🥚豬同雞都各點了一款，山形縣產煙燻豬腩，經過煙燻處理，食落無咁油膩，仲多咗煙燻香味，幾特別🐷炭火雞腿肉食落去真係有種炭火味，寧舍香🐣質地嫩滑，又充滿肉汁。另外一開始上菜前，店員比咗一啲蔬菜例如椰菜同洋蔥俾我哋燒，呢啲配菜都好好食👍🏻而燒肉都有包肉菜，麩皮提供，醬汁都有幾款，呢方面值得一讚。