上海美華菜館 (Closed)

同屋企人掃墓完畢，又唔想飲茶，想揾番之前同男友食過嘅上海菜小館(真可惡問佢又遲覆)，又攰又熱又肚餓，跳上的士～但我記錯左⋯⋯一東一西，是但啦，既然又差不多到達，加上的士司機又搭咀推介，於是一試美華，先黎個涼拌菜小食～燻魚，甜甜地醬汁有少少似鰻魚汁燻出淋淋的魚，份量算十足，好味但小心多骨。小籠包不算得薄皮，勝在湯汁肉料豐富，可接受但驚喜感不足。上海粗炒我唔中意因為太油膩，但舅舅一坐底就話要食，真係好油，但色水、味道啱啱好，撇外佢油「冧冧」嘅缺點係好味嘅。三鮮冷麵嫌麵粗而且比較硬，一般啦。高力豆沙即點即做熱辣辣，漲卜卜嘅蛋白球包住唔太甜嘅豆沙餡，作為餐後甜點～激讚。