胡爐 (Closed)

太陽一落山，天氣就急轉涼！嗱嗱臨去搵間打邊爐！鍋底冬天必須來一個滋潤嘅花膠雞鍋，雞件好足兩，第一啖湯非常潤喉，而且濃郁無比，一定一定要先飲一碗湯再進行打邊爐嘅環節！丸餃類餐廳全部都係手工丸餃，當然要叫返幾款。手打香茜炸菜牛丸相當香濃、蝦丸彈牙粒粒蝦肉、黑松露墨魚丸淡淡幽香！手工雲呑皮薄餡靚，自家制韮菜餃同樣鮮香多汁。胡爐牛拼盤一客五款：牛舌芯、安格斯手切肥牛、極上手切牛頸脊、牛胸爽、霜降牛粒。特別喜歡佢嘅厚切牛舌芯，爽口有牛味；安格斯手切肥牛牛脂味特出；牛頸脊肉質細膩；霜降牛粒淥耐小小都唔怕老，食落帶點嚼勁，味道香盛。炸紫菜響鈴邪惡之選，即叫即炸，油份唔算特別重，小編特別鍾意裏面包着嘅紫菜極度香口，外皮薄脆，唯定價稍高。