Thre3 concept (Closed)

對我嚟講，Thre3 Concept 最吸引嘅肯定係佢個鏡仔 corner，擺放咗非常多嘅應援物，難怪唔少鏡粉會專登嚟打卡。聽講晏晝呢度真係幾多人，好彩揀咗晚上先嚟幫襯，唔使等，任坐唔嬲，店員仲有時間同我哋吹水，講下鏡圈見聞。先嚟個最 basic 嘅 Margherita Pizza，toppings 只有蕃茄，蕃茄醬，芝士同羅勒葉，全部都係我最鍾意嘅食材，好簡單，但係正所謂 less is more，愈簡單就愈能食出每種食材嘅味道。餅底方面則略嫌太薄，唔夠脆，呢個有改善嘅空間。之後係 Thre3 芝牛堡，burger 嘅食材唔算多，除咗漢堡扒之外，有芝士，蕃茄，羅馬生菜同煎蛋。呢度嘅漢堡扒調味較少，肉質較實，不過牛味幾濃，蕃茄同羅馬生菜都算新鮮，加埋醬汁同其他配料，整體唔錯，伴碟嘅連皮粗薯條亦新鮮熱辣，好食。最後叫杯 Caramel Americano，呢個配搭未飲過，原來又幾好飲喎。