鐵堂 (Closed)

仲有唔夠兩個星期就過年，趁今日假期，唔使返工，專登過嚟佐敦辦年貨。行街前先醫飽個肚仔，喺白加士街見到有間日本餐廳，睇咗門口嘅餐牌，原來晏晝有套餐供應，價錢好經濟，加上新開張，第二位仲有半價優惠，一於試下。我哋每人點咗一個午餐，套餐以「金、銀、銅、鐵」命名，非常特別。《銀》套餐有枝豆、唐揚炸雞、蟹肉可樂餅、牛肉壽喜燒同紫菜飯。枝豆很爽口，豆味濃郁，食得出好新鮮。唐揚炸雞即點即炸，咬下Juicy 有肉汁；而可樂餅味道亦唔錯，外層鬆軟，餡料香滑，入口 Creamy 味美。壽喜燒用料亦絕不欺場，湯底甜甜地，入面有勁多肥牛、金菇、冬菇、雜菜、紅蘿蔔同標誌性嘅生雞蛋，用嚟配紫菜飯食，飽肚又滿足。至於另一客《鐵》套餐就包括有麵豉湯、味付螺肉、唐揚炸雞、蔥燒牛小排同月見飯。麵豉湯味道啱啱好，入口濃淡得宜。螺肉彈牙帶嚼勁，而唐揚炸雞亦熱辣香脆。另外牛小排都好正，脂香同肉香都非常豐富，入口啖啖滋味。月見飯水準亦一流，飯粒煙韌飽滿，與日本生蛋黃拌勻，每啖都充滿濃香蛋味。