Ocio オシオ (Closed)

居於鑽石山多年, 雖然有大型廣場, 但附近亦無一間甜品店。近月荷里活開咗間Café, 除了主食, 仲供應多款甜品, 終於可以同三五知己食完dinner轉場黎食甜品喇!餐廳光猛闊落企理, 點了三款甜品一齊分享。蜂蜜雪山熱香餅 HK$68熱香餅超軟熟, 雙層疊起可以趟下趟下咁郁, 質地帶點濕潤, 有陣陣甜甜蛋香。配上雲呢拿雪糕、楓糖醬, 自行沾上, 食落多一點點甜。奧斯蜜瓜雪山熱香餅 HK$98雲呢拿雪糕同埋單層厚厚熱香餅放於半個蜜瓜之上, 再有蜜糖星星同埋杏仁片做陪襯, 賣相吸引又能盡顯份量。除了可品嚐軟熟兼有蛋甜香嘅熱香餅沾上雲呢拿雪糕, 蜜瓜內已起核, 藏了幾粒奶凍方塊, 最後刮起蜜瓜肉食, 超清甜多甜又多汁, 滿足哂我呢個蜜瓜控。Brownie Waffle HK$68窩夫口感似蛋糕軟身質地, 沾上朱古力雪糕凍凍地一齊食, 軟綿中帶點甜。另配上酒心朱古力再令整個朱古力窩夫增加多份口感, 一次過享受三款朱古力層次。