Video
Read full review
2011-10-12
980 views
我和大家姐 (其實係我老婆嘅大家姐先啱) 係同月同日生，所以每年都一齊慶祝生日，今年都冇例外；老婆就特登係秋田book咗間房，幫我哋慶祝。其實要食好嘅鐵板燒，係香港島，尚有幾間可以選擇，但秋田卻總可以俾到一些驚喜給客人，尤其係一d未黎過嘅朋友。今次係book咗諾士佛臺嘅分店，雖然開咗都差不多一年，但係就未黎過。分店係座落於諾士佛臺中間位置，係”響”對面。一步入諾士佛臺分店，店舖唔大，中間係通道，兩邊係吧枱，左邊係鐵板燒枱，有兩枱，右邊係壽司枱；再行入d，就有兩間鐵板燒房，我哋就坐係最入嗰間房，如坐滿的話，可以容納十人。一坐下，先點一枝sake，我哋一行五人 (其中一位仲係中學生)，對sake都冇咩認識，只要純滑，易入喉，唔辛口，就可以，以往飲過”上善如水”，覺得完全符合我哋嘅要求，所以就諗著照舊，但係服務員建議我哋試第二支sake”淡麗吟釀”，佢話”上善如水”真係清淡如水，唔夠香，呢支”淡麗吟釀”相比之下，必定比”上善如水”好，我哋有d猶疑，一來唔知是否啱飲，二來又唔知嗰服務員是否可信，嗰服務員見我哋猶疑之際，就二話不說，揣來兩杯sake，讓我們自行判斷；正所謂一試便知龍與鳳，兩杯sa
其實要食好嘅鐵板燒，係香港島，尚有幾間可以選擇，但秋田卻總可以俾到一些驚喜給客人，尤其係一d未黎過嘅朋友。
今次係book咗諾士佛臺嘅分店，雖然開咗都差不多一年，但係就未黎過。
分店係座落於諾士佛臺中間位置，係”響”對面。
一步入諾士佛臺分店，店舖唔大，中間係通道，兩邊係吧枱，左邊係鐵板燒枱，有兩枱，右邊係壽司枱；再行入d，就有兩間鐵板燒房，我哋就坐係最入嗰間房，如坐滿的話，可以容納十人。
一坐下，先點一枝sake，我哋一行五人 (其中一位仲係中學生)，對sake都冇咩認識，只要純滑，易入喉，唔辛口，就可以，以往飲過”上善如水”，覺得完全符合我哋嘅要求，所以就諗著照舊，但係服務員建議我哋試第二支sake”淡麗吟釀”，佢話”上善如水”真係清淡如水，唔夠香，呢支”淡麗吟釀”相比之下，必定比”上善如水”好，我哋有d猶疑，一來唔知是否啱飲，二來又唔知嗰服務員是否可信，嗰服務員見我哋猶疑之際，就二話不說，揣來兩杯sake，讓我們自行判斷；正所謂一試便知龍與鳳，兩杯sake一試，証明嗰服務員所言屬實，”上善如水”果然比下去，”淡麗吟釀”比”上善如水”香甜，一樣易入口，唔辣喉，再看一看價錢，只需$438一支，不比”上善如水”貴，所以我哋就要了一支；同時，我哋亦對呢位服務員另眼相看；事實上，呢種服務態度及敬業精神，係完全值得我們學習，值得讚賞。
我哋點咗個”松板”四人前套餐，每位$888，但係嗰服務員話依家已經冇再用松板和牛，轉用鹿兒島和牛，其他嘅食材都冇變，我哋冇所謂，照落單；因跟餐只得四件拖羅，所以我哋額外加多一件，另外再加多一份”竹”刺身盛$598和一碟雪場蟹拼松葉蟹$428。未食刺身前，我哋嘅King師傅先為我哋炮製鵝肝蒸蛋，其實做法都非常簡單，只要將鵝肝放入雞蛋內，一齊蒸熟便可以，火喉反而更重要，蒸得太耐或太短都唔好食，蒸熟後，再放些飛魚子上面，便大功告成；入口，熱騰騰，飛魚子味唔濃，並冇搶走蛋香和鵝肝嘅味道，只係俾食客嫩滑中帶丁點爽脆嘅咬感，發揮咗畫龍點睛嘅效用。
因刺身準備需時，服務員亦好醒目地揣上一碟燒魚翅拼雞泡魚乾，等我哋可以一邊食，一邊等；兩者都燒得乾身，不過燒魚翅味較雞泡魚乾淡，而且亦比較韌，我就比較喜歡雞泡魚乾。
”竹”刺身盛和拖羅一齊上，刺身盛內裡有牡丹蝦、海膽、秋刀魚 (因為池魚沽清，所以轉做秋刀魚)、赤貝、章紅、彷彿魚，仲有一種唔記得咩名嘅魚；當中，秋刀魚最難食，有少少腥味，質地亦唔爽甜；另外，彷彿魚就比較特別，平時比較少食，質地同一般白肉魚差不多，味唔濃，幾鮮甜；牡丹蝦亦頗大隻，非常甜美，入口仲有黏口嘅感覺；最正嘅當然係拖羅，跟餐嗰四件比較細，尚可稱半肥美，油脂唔算多，但均勻，入口都非常香滑，散叫嗰件當然大d，不過要$100一件，都頗貴，但比跟餐嗰四件更肥美。
刺身過後，就輪到雪場蟹拼松葉蟹，每款四件，鮮味，肉汁充沛，但雪場蟹唔夠肥大，有d瘦削，始終食肥大嘅雪場蟹係比較開心，比較滿足；至於松葉蟹，當然比雪場蟹更鮮味，更有蟹味。
一輪衝刺後，King師傅開始為我哋下廚，首先，當然係海鮮啦，龍蝦與鮑魚；龍蝦係印尼來的，都幾大隻 (每隻需加$80！)，非常生猛；鮑魚則是澳洲來的，大過隻手掌，更生猛，哈哈。King師傅先將兩隻龍蝦放上鐵板，把龍蝦肚燒至半熟，跟著就用純熟嘅手法，把龍蝦嘅頭與身分開，再將龍蝦殼除掉，蝦膏就起出來煮汁，再淋上龍蝦肉，未食，已聞到濃郁嘅香味，金黃色嘅蝦膏，鋪係煎香嘅龍蝦肉上，賣相已經夠吸引，食入口，首先係嚐到濃郁嘅蝦膏香味，再咬落去，就嚐到龍蝦嘅鮮味，蝦肉亦爽口彈牙，五個人分享兩隻龍蝦，每人嘅份量都唔少。
至於蝦頭和蝦殼，先擺好嗰堆，再贊酒，後點火，哈哈，似玩把戲多d，不過，都幾過癮，可以將氣氛推高，及後，就會將d蝦頭和蝦殼，攞去熬湯。龍蝦過後，輪到鮑魚，亦都係一貫嘅做法，將鮑魚起殼後，再切簿片，加入適量嘅調味，包括鹽、黑椒、牛油、豉油等，好快就食得；食鮑魚，最怕韌，但King師傅嘅火喉，剛剛好，一d都唔韌，惹味之餘，亦唔會將鮑魚嘅鮮味蓋過，唔錯。
接著下來，就係鵝肝多士，原本諗著加多一份，但係King師傅話可以幫我哋分做五份，所以唔駛加錢加多一份，嘻嘻，King師傅先將五塊法飽放係鐵板嘅邊緣，微微將佢烘熱烤焦，再用大火把鵝肝煎香，把鵝肝嘅油份鎖著，再加鹽、黑椒、紅酒同豉油，冇錯，係豉油，我原本以為係黑醋，但King師傅話嗰支唔係黑醋，係豉油，下次等我都試吓用豉油煎鵝肝先，哈哈；鵝肝表面煎得焦脆，放係法飽上面，可以讓多餘嘅油份流入法飽內，一來，入口時唔會有多餘嘅油份，二來，嗰法飽又可以吸收鵝肝油嘅香味，一舉兩得；外脆內軟，香味十足，但係法飽雖然可以吸油，但係我就比較喜歡煎鵝肝配青蘋果，因為青蘋果嘅酸味，可以令人忘記咗鵝肝嘅油膩，口感上與心靈上都可以得到無限嘅慰藉，反而法飽則令人有一種飽滯嘅感覺，所以身旁兩位女仕，都冇法盡情享用呢件鵝肝多士，我哋兩位男仕只好一盡紳士風度，把什麼膽固醇、脂肪等等拋諸腦後，勉為其難地一人食多半件，哈哈。
主角出場啦，係鹿兒島A5和牛，好大塊，服務員話足足有16安士，頗厚身，中間嘅雪花都頗均勻，紅白交錯，幾吸引，只可惜其他部位就比較差，有兩、三個位置，明顯地比較肥，King師傅好細心地將中間最靚嘅部位切出，先用一塊肥膏起鑊，再用猛火把和牛兩面煎香，將肉汁鎖著，最後，把和牛四邊烘一烘，前後唔駛三分鐘，一塊medium rare嘅和牛已經處理好，King師傅把和牛切開，每人僅分配到兩小塊，哈哈；外面香脆，入面呈粉紅色，清楚見到牛肉嘅紋理，睇見已經覺得肉汁豐富，忍唔住，一啖咬落去，肉質非常柔嫩，有嚼頭，但唔韌，亦冇渣，肉汁豐富，香味十足，油份則比預期少，反而唔覺肥膩，上品。
至於其餘嘅部位，King師傅將d比較肥嘅部位切起備用，其他嘅半肥瘦，則加入鹽、黑椒、豉油等爆香，食落都頗重肉香味，有嚼頭，佐酒唔錯。正當我哋回味之際，服務員就為我哋揣上龍蝦清湯，並非味噌湯底，係清湯，入面只有兩隻蜆仔和兩片蘿蔔，味道清甜，但海鮮味則欠奉，食完鵝肝與和牛，都好應該呷一口清湯來緩和一吓。
同一時間，King師傅已為我哋準備炒翠肉瓜，除咗一貫嘅鹽、黑椒、牛油、豉油外，仲加咗d水同蒜茸，炒起都頗香口惹味。
未正式炒飯前，當然係秋田嘅招牌表演，今晚King師傅為我哋炮製咗一隻鬆弛熊和一隻Winnie the Pooh，等我哋兩個壽星仔女，一人一隻唔駛爭，哈哈；King師傅跟著就使出拿手好戲，用鑊剷，將隻蛋拋高，待隻蛋趺落鑊剷嘅邊，等d蛋黃沿著鑊剷邊滴到鐵板上，為我哋寫上祝福嘅happy birthday，非常精彩，小朋友更睇得開心。攪完一輪後，加d煙肉、櫻花蝦，同埋頭先嘅和牛肥膏，就炒埋一碟，成為秋田嘅和牛膏炒飯；飯，夠乾身，粒粒鮮明，炒得不錯，亦有香味，因為有櫻花蝦和飛魚子，有爽脆咬感，唔錯，反而和牛膏則不能帶來肉味，而且有d韌，不要也罷。
甜品，當然係叮噹飽啦，不過我哋要求唔要紅豆餡，換成雪糕餡，我要綠茶味，佢哋四個都係要芝麻味；King師傅將d蛋漿放上鐵板，當餅皮差不多ok時，King師傅就用對講機，叫人把雪糕奉上，因為太早攞入來，溶哂都未攪掂，King師傅隨手就將雪糕球一個一個咁放上去，再用另一塊餅皮蓋上，用鑊剷輕輕一壓，就迅速地放到我哋面前，仲叫我哋怏d食，否則後果自負，哈哈；一咬入口，嗰種外熱內冷嘅感覺，非常誘人，除咗感覺到軟熟嘅餅皮同軟滑嘅雪糕外，咩嘢味道都感覺唔到，只係覺得暖中帶凍，非常過癮，甜度，唔覺得好甜，相信好多朋友都可以接受得到，只要你一試，包你上癮，其他甜品都唔駛試，哈哈哈。
因為我哋生日，秋田仲特登送咗嗰朱古力蛋糕俾我哋 (其實只要book枱時同佢哋講低，佢哋就會安排)，雖然細細個，味道亦都一般，但係就非常窩心，令人每每幫朋友攪生日飯局，都會諗起秋田。
是日結算$5,800，平均每人$1,160，不過今晚係老婆請客，多謝老婆。Post
