雲壽司 (聯成商業中心)

Open Now

Now Closed

以簡約日式設計為主，有一張可容納十多人既 L型吧枱，可以望住師傅們準備食物，前面有一個凍櫃擺滿各款刺身，而座位亦有提供綠茶粉及自助熱水～當日有五個駐場師傅，所以上菜速度好快。主打平價廚師發辦及壽司刺身拼盤，另有午市定食及可以單點壽司～❀ 特上壽司拼盤升級版壽司拼盤，總共有十款壽司，包括：吞拿魚腩、深海池魚、牡丹蝦、赤貝、海膽、三文魚籽、火炙左口魚邊、鯖魚、魴鮄及蔥吞拿魚腩壽司，款款都好新鮮，當中最中意係火炙左口魚邊、吞拿魚腩、牡丹蝦及海膽壽司💕 赤貝肉質爽口，鮮味十足。鯖魚就比較少見，質感飽滿，新鮮爽口。深海池魚質感厚實，魚味較濃又帶點魚油香。而魴鮄就因為賣晒而轉了真鯛，真鯛肉質爽口緊緻，魚油分佈均勻。吞拿魚腩色澤好粉嫩，質感軟嫩，完全無筋，入口魚油甘香。牡丹蝦甘香鮮甜，滿滿膠質，口感爽彈。左口魚邊經火炙後充滿焦香油脂香，入口即溶，非常香口。另外仲有三件軍艦壽司～海膽色澤橙黃，食落飽滿鮮甜，無腥臭味，而且質感軟綿細滑，入口即溶。三文魚籽晶瑩剔透，新鮮爽口，一咬落去滲出鹹香既鮮味。蔥吞拿魚腩蓉份量好多，口感軟綿， 配埋蔥粒及紫菜食，味道更香濃～