A.T.A.S

Open Now

Now Closed

除咗叻沙同海南雞飯，其實新加坡菜仲有五花八門嘅菜式，今次就去咗銅鑼灣一間人氣餐廳A.T.A.S。餐廳採取自助形式，先揾座位然後去櫃檯點餐並付款，完成後店員會比客人pager，當餐點準備好就會透過pager通知客人取餐，餐具、調味料等都可以去旁邊櫃檯自取，好有新加坡bazaar風味！炸魚片米粉（$98）粗米粉吸收咗濃厚魚湯，非常軟身，加上炸到香脆嘅炸魚片帶有淡淡酒香同胡椒味，配料仲有白菜、蕃茄、紫菜，健康又好食。肉脞面（$88）我哋另外叫咗一款較為濃味嘅新加坡麵食，配料非常豐富，有豬肉碎、豬肝、魚蛋、滷冬菇、炸雲吞、生菜等，麵底就揀咗老鼠粉，因為調味料落咗少少醋同辣椒，入口酸酸辣辣，好開胃！辣椒蟹肉醬配炸饅頭（$98）呢個好有驚喜！炸饅頭外脆內軟，蘸埋香辣蟹肉醬，呢款地道嘅菜式令我一下子好似身處新加坡！斑蘭薏米水（$28）每次食新加坡菜必點薏米水，呢款比較清淡，粒粒薏米好有咬口！酸梅青檸水（$30）原粒酸梅加兩粒青檸，清新開胃，非常解膩。