泰式食

Open Now

Now Closed

銅鑼灣唔少樓上餐廳都幾抵食，最近就發現左呢間泰式食。一入門口就比佢充滿泰式風情嘅佈置吸引，除左比較常見嘅泰式擺設如佛像、流水台外，最特別就係佢有架泰國的士Tuk tuk！我同朋友下午都食得比較飽，所以來到淨係叫左野飲同三樣野食share，分別係串燒、炒貴刁同一個甜品。龍眼冰&泰式奶茶兩杯野飲都唔錯；特別係個龍眼冰幾多龍眼肉！沙爹串燒豬肉同雞肉各兩串，兩款嘅肉質幾軟，唔會好實，同埋肉本身醃得好入味，燒得又唔燶，微微燒香過。佢個沙爹醬真係精髓，食落嚐到醬裡面唔同香料嘅味道，好惹味。皇宮大蝦蛋網炒貴刁呢個炒貴刁係特別有個煎蛋製成嘅網包住粉，賣相幾特別。上面嘅蝦好大隻，肉好多，炸得香脆可口。粉條伴芽菜、蛋一齊炒，醬汁酸酸甜甜，又唔算太濃味，炒得好好食！如果鍾意濃味D，伴碟有蒜蓉碎、辣椒粉，食個時可按個人喜好加入。椰汁千層糕充滿椰汁嘅香味，口感煙韌，呢個千層糕系剛剛蒸好熱辣辣辣上碟，建議攤凍一陣先食個口感更佳。