香港嘆得起冰室 (Closed)

放工同屋企人過嚟長沙灣呢邊探親戚，去到食飯時候大概8:30pm，就周圍搵食啦。見到呢間餐廳幾光猛，而且係大街好容易搵，乾淨企理嘅感覺，就一於入去試吓。最近疫情關係大家都少咗出街食飯，但係呢間餐廳嘅預防措施都唔錯，有晒隔板，有晒探熱步驟，令客人食得安心。同屋企人最鍾意食小菜，叫咗兩個小菜跟餐餸白飯同嘢飲，首先上菜嘅係熱辣辣嘅南瓜湯，夠晒熱，唔錯。然後就係紅豆冰，我好鍾意每一個餐廳都叫紅豆冰試吓，因為唔算好多餐廳做得好，而呢個餐廳我要重點推介佢哋嘅紅豆冰。首先椰奶夠香，好香濃，而且紅豆夠沙，豆又夠多，夠晒甜。啱啱好😍真係好好飲。之後就係霸王雞，賣相好靚，而且雞件有夠多，$78來講份量算好足夠啦。雞件好滑，醬汁唔會太鹹，味道剛剛好。沙拉骨就係我細細個都好鍾意食嘅小菜，呢個沙拉骨醬就多咗少少，但係味道好唔錯，排骨都夠軟身，唔會粒粒都有骨，好好送飯。