扒王之王 (Closed)

長老想食鐵板餐，要求坐得舒服，冷氣唔好太大吹親佢。餐廳職員安排我哋坐近門口的卡座，令長老相當滿意，我就勁鍾意個懷舊feel。長老睇到餐牌有豬手，即刻放棄鐵板餐。叫咗個漢堡扒蒜汁豬手配薯菜，萬一豬手太硬食唔到，仲有漢堡扒替代。午餐跟羅宋湯、餐包同熱飲。湯夠熱、料多、香濃，唔係水汪汪；餐包有熱感，搽牛油落去冇耐就溶晒入包。食晒呢兩樣嘢，已經飽飽地。豬手出場時，長者第一時間食炸薯條，讚夠脆，不過灑鹽唔平均，一條鹹，一條淡。至於豬手，好夠腍同入味，長老全部食晒。漢堡扒有種手搓扒的風味，可惜煎燶咗少少，但無損味道，多啲肉汁會更好。另外叫咗焗雞扒飯，用炒飯底，雞扒正常大細；醬汁有番茄、芝士、蘑菰、西芹、甘筍、洋蔥，用料比大快活的豐富得多（當然價錢有差距）。同長老分享啲飯，佢自己加啲豬手汁落去，食晒成碗。奶茶有茶香，喜歡。隔離枱食客都係老友記長，佢食唔晒個餐，自備外賣盒帶走。店員對長者都好體貼，不時問使唔使加水、幫手清走碗碟，服務周到。長老聽到鄰枱傳出鐵板餐獨有的淋汁咋咋聲，約定下次嚟食鐵板餐。