同人鍋 (Closed)

打邊爐呢樣野，無論幾時都係咁想食咁鐘意食！今晚就同朋友去到出名多餐廳嘅山林道，食下呢個無限時嘅雞煲火鍋。餐廳需要上一層樓梯就到，坐得都闊闊落落。坐低無幾耐，店員已送上熱辣辣雞煲，配料非常豐富，包括有大量洋蔥、辣椒、芹菜同芫茜等等，雞件都幾多同肉質嫩滑，沾埋D洋蔥一齊食好惹味！ 食到咁上下鷄煲後, 就到重點火鍋湯底登場！有原隻龍蝦/花膠湯底選擇, 我地海鮮愛好者就當然選前者，除左大大隻龍蝦，仲有海鮮拼盤：鑽石蜆、鮑魚、廣島蠔、白鱔、和海蝦、花甲、魷魚等等時令海鮮，包你個湯底更加鮮甜無比！除左特定幾款如鮑魚,無得追加，其他都可以refill, 食多幾轉真係好抵！店員都好好咁提醒海鮮的受烹調時間，唔會overcook浪費左海鮮喇！最緊要D海鮮係新鮮無沙，咁先食得安心。 店員轉頭又遞上火鍋料，如肥牛，丸，午餐肉，腸仔，蔬菜、水餃等等，當然大家可以食完再REFILL。比較特別如紫薯水晶包同台式腸都好好味又少見，我食左好多紫薯水晶包，好煙靭又唔太甜，值得一試！ 飲品方面，店中有個飲品櫃，可以自己隨便去拎，無限時關係，可以盡情食下飲下傾下，都係朋友聚會好地方呀！