味真越 (Changed Hand) New Restaurant

南區線開通之後多咗好多新餐廳鴨脷洲，海怡半島，黃竹坑等等星期六日好多人。今個星期探朋友同佢嘅小朋友，因為小朋友嘅play group 遲咗所以呢就去食個下午茶先至去接返佢。佢話附近開咗間越南野，地方就真係比較細，不過尚算乾淨，點左香茅豬扒湯檬呢個真係好好食，香茅豬扒鬆化香茅味重，份量夠多，配上足料又大碗嘅粉面，＄50有咁多豬扒好抵食，已經越來越少見咁足料！我諗呢度嘅香茅雞翼同豬扒應該係招牌菜，豬扒完全無雪味，鬆化又有肉汁，應該係即叫即整嘅威力！再點左個越南春卷，份量好多加埋有八件，餡料夠又多款式，有粉絲木耳紅蘿蔔絲等等，上枱熱辣辣又唔會太多油，配生菜食可以減少邪惡感。略嫌呢度嘅碌冧唔夠味，如果可濃多少少就好啦！飲品方面呢度冇奶茶咖啡，檸檬茶檸檬水，有越南式啲嘅檸七鹹檸七等等，就戒一日咖啡咁多啦！下午茶餐真係好抵，必選一定係香茅豬扒同雞翼。