牛摩 (荃灣千色匯I) (Under Renovation)

好耐冇入荃灣， 於是同男朋友一齊走入荃灣行下街食下野。行到千色，唔知點解覺得超級肚餓，好似普通一個飯都唔會食得我飽。由於小妹肚餓到咁上下時就會開始黑面、發脾氣、仲會發癲。於是男友老遠見到牛摩，諗住任食可以餵飽我，拿拿聲就拎我入去醫肚。時間岩岩好過左午市，所以都冇咩人食飯，唔使等位。未入座，侍應會喺門口問定你想咩咩湯底先，我地揀左左昆布清湯同豬骨濃湯。侍應們既服務都好好，雖然我地得兩個人，都安排左卡位比我地坐，夠唒舒服！可能係間鋪既地理問題，天花位係玻璃。如果坐到入少少既位置既，一抬頭就可以望到個天。日間既關係，鋪面都盡量採用自然光，呢點要讚，夠唒環保！另外，店鋪都設有兩部大電視播 NOW 台既節目，唔怕悶親！一坐低已經急不及待叫我男友幫手拎野食返黎。出面可以拎既通常都係菜 / 麵 / 烏冬 / 沙律 / 甜品等等，肉要嗌待應拎~到今日主角食牛，已經餓到係咁食係咁食 XD今次揀左美國牛，食入口好香。牛既脂肪雖然唔太平均 (一分錢一分貨)，但都係有少少口感，唔會唔知自己食緊咩。豬肉方面有驚喜，冇諗過任食日式火鍋既豬肉都可以咁有豬味！咬落去軟棉棉，但又有好香好濃既豬肉味喺口中湧出黎，正啊喂！