Elmo's Bistro & Bar (Closed)

朋友係灣仔返工，約左收工吹水hea下，推介左Elmo’s Bistro & Bar。地方唔大，但開放式廚房，野食即叫即整，新鮮熱辣，仲好方便吹水。一坐低即送上香脆法包，可以點上健康黑醋加蒜蓉，好正好高級。點左杯orange iced tea，用上茶包即沖，之後加入兩大塊鮮橙，新清開胃又唔甜，感覺好健康。話明吹水，蒜蓉薯條同黃金雞翼冇走雞。薯條比較粗身，加上生蒜蓉連同香草，入口首先係生蒜蓉既香同辛辣，之後有香草淡香，最後先食到薯條本身既油炸香味，第一次食有生蒜味薯條感覺好特別，好回味。黃金雞翼做到都好出色，雞翼一開為二，方便食客，而且更入味，用壓碎左咸蛋黃包住雞翼，所以好香濃，咸蛋黃一啲都唔咸，雞翼肉汁都算豐富，雞肉都嫩滑，令人忍唔住一隻駁一隻係甘食。最後叫左碟牛肋骨，佈碟好精美，除左沙律外，更有小露筍同車煎過車厘茄，以及炸薯，好飽肚。牛肋骨淡淡粉紅色肉汁好吸引，因為汁鎖得好，所以七成熟肉質都幾鬆軟，不過下次可以試五成，應該更鮮嫩。整體上，食物有保證同新鮮，又方便吹水，算你一個唔錯既新落腳點。