A100餐廳

Open Now

Now Closed

難得晨早流流去上水，當然係我最鍾意嘅茶餐廳食個早餐先。喺火車站附近有好多茶餐廳揀，都唔知揀邊個。行啦行去到啲小巷，有間茶餐廳細細地，但係個門面就幾吸引，所以就入咗去食咗早餐。一份標準嘅港式早餐，一定有沙爹牛麵、奄列同埋牛油方包。其實唔同茶餐廳做沙嗲牛嗰個醬汁都有唔同嘅味道，有啲會偏鹹啲，有啲就側重辣味，但普遍都係以啡黑色為主。而呢間就似五香肉丁汁加沙嗲牛，未知呢個溝法係佢專登定唔小心，令我有少少混淆，食落去仲有啲兩頭唔到岸嘅感覺，而麵嘅質地就非常之一般，所以兩樣加埋起上嚟就失色啲。至於奄列就冇落奶，亦因為煎過熟老火咗。牛油方包就標榜厚切麵包，其實薄切多牛油已經夠，厚身麵包如果發得唔好，就變咗死死實實，成塊嘢凍冰冰哽落口好難受，所以麵包都唔得。最後唯有杯檸檬茶，正正常常3片檸檬，好彩仲有啲檸檬味。成份早餐都搵唔到重點好食嘅地方，呢個價錢喺其他地區應該會再好啲。