Meraviglia Bar e Ristorante (Closed)

一入到餐廳即刻同阿仔辣一辣場先，上次嚟阿仔仲係得一歲鬆啲，好多嘢都玩唔到，而家佢四歲喇，應該可以盡情探索；餐廳入口右手邊嗰堆煮飯仔、小模型屋同埋船仔都已經令佢樂不思蜀，好不容易先至叫到佢埋位開飯。烤天然豬肋骨配薯角，豬軟骨口感軟嫩，本身已經相當好味，若然點埋隨附嘅肉汁，味道層次感提升，薯角作為配菜亦都絕不馬虎，香脆非常，全靠佢引阿仔返嚟食嘢。自家製蕃茄醬、水牛芝士、香腸及辣肉腸薄餅，薄餅上到枱都仲係熱辣辣，芝味濃郁，芝士同埋辣肉腸呢個經典配搭，令人百吃不厭。食飽之後就同仔仔出去户外區玩，户外區有吹氣滑梯、繩網、sir 滑車，仲有上次嚟都未有嘅吹氣迷你滑水池，咁啱上晝同阿仔去完 Art Jam 有帶多套衫，即刻大解放落水玩。留意番大人細路每位低消只係百五蚊所有設施就可以任玩，有食有玩有乾濕埋單都只係四百零蚊，tea time 嚟真係無敵抵。