麵屋武蔵 武骨相傳 (朗豪坊)

Open Now

Now Closed

前幾日同朋友去到朗豪坊蒲，行到有啲餓就去咗麺屋武蔵食拉麵。一行到去就見到佢變身成AAPE x Menya 嘅 Pop-up Store，AAPE 10週年仲出咗一款crossover嘅猿侍ラーメン拉麵套餐。猿侍ラーメン拉麵套餐($138)每日限定10碗，我地見到仲有得叫即刻唔執輸叫一set嚟試下。呢個套餐仲包咗武藏餃子/武藏炸雞，仲有醬油果凍柑橘啫喱特飲-曙光（個名好威！）呢個麵用咗豚‧雞‧魚介湯底，味道好豐富。佢地仲加咗自家煉製蝦油，加埋櫻花蝦有好香嘅蝦味。我連啲湯都飲埋呀，個麵就好彈牙爽口！配搭嘅慢煮伊比利亞豬肉好嫩滑；仲有原隻紅酒漬溏心蛋，粉紅色好吸引！小食我地要咗炸雞，外脆內軟滑又多汁，份量都唔少㗎！而曙光飲落好清新，有淡淡嘅柑橘味，仲有啖啖嘅啫喱添。我地另外仲叫咗二刀流拉麵($85)，我哋揀嗰個黑蒜湯底味道好濃郁，拉麵一樣咁煙靭，叉燒半肥瘦好適中。五輪燒餅($58)用咗廣島蠔嚟整，份量都好大同埋整得好厚，口感好爽，蠔鮮味加上沙律醬好正。飲埋日本製嘅巨峰梳打($28)，好似真係去咗日本咁。