一葉台灣料理

Open Now

Now Closed

傍晚時分去咗鰂漁涌站同人交收完，見有d肚餓，咁就出去行吓搵野食，出到去原來係芬尼街，剛巧見到有間台灣菜館著燈開門，咁就即管行入去試吓，反正好耐冇食台灣菜！可能係剛開始晚市時段，店內只得我一個人，我就梗係留意吓嗰環境，睇吓有冇咩特別野，感覺上呢間似係街坊小店多啲，再睇睇餐牌，好多嘢揀，基本上台灣嘢必食一定有，個人覺得價錢反宜係似宜家d茶記價$喎！正在諗緊食乜好，可能我係小妹原因，店長推介話今日d地瓜苗好靚，問我要唔要試吓佢哋嘅皮蛋地瓜苗，咁我就話好丫，但係我同佢講又想有少少肉食，有咩好介紹，佢話梗係蔥爆牛肉，唔食牛咪揀豬同羊都可以，咁我就點左呢兩樣店長推介。果然真係街坊小店呀，坐咗一陣間，以經有熟客仔進場，入嚟外賣嘅都唔少，咁我都覺得自已起碼無揀錯先！先嚟嘅係蔥爆牛肉，見到d大蔥切成細段，亦都比較多，名符其實蔥爆，牛肉鮮嫩入味，夾埋一齊食幾好味喎！再嚟皮蛋地瓜苗，用鑊仔浸上湯上，感覺好似藥饍feel, 有杞子，薑片，皮蛋好好食，地瓜苗店長真係冇介紹錯，我全部食晒。整體來講，環境小店格局，清靜舒服，今次食嘅全部都係店長推介，一個人試得唔多，再過開鰂漁涌，會再次幫襯。