Video
Read full review
2020-11-08
281 views
買咗啲嘢獎勵下自己，咁不如就一不離二，食番餐好嘢啦。 諗起之前留意到觀塘有間隱世法國菜，就去試下lunch啦，間餐廳位於亞太中心3樓，係一個旺中帶靜嘅地方。 坐低咗之後，望下餐牌，午餐嘅選擇唔算好多，但係都足以令我有選擇困難症，因為每一樣嘢食都好好食咁，最後我喺法式香蛋厚燒西班牙黑毛豬鞍，同埋西班牙紅蝦配自家制蝦油天使麵之間，選擇左前者， 因為我好好奇佢嗰個法式香蛋豬鞍 （HKD258），係點樣嘅整法呢? 經店員推介，而我又較肚餓，所以加錢要咗冰鎮荔枝浸蕃茄（HKD28），同埋北海道帶子配茴香檸檬蜂蜜汁 （HKD88）。 先嚟到嘅係沙樂美腸沙律， 沙律入面嘅醋係兩種陳年醋，而個細細一片粉紅色嘅係店家自製嘅櫻桃蘿蔔。個沙律菜好新鮮，每一塊都係爽脆㗎，醋嘅味道同份量啱啱好，再配埋少少酸嘅櫻桃蘿蔔， 非常醒胃。 之後嚟嘅係北海道帶子，好巨型嘅帶子呀! 用一個杯裝住好似食緊雪糕咁，帶子下面就係茴香檸檬蜂蜜汁，帶子上面就係好似分子料理咁嘅wasabi 彈珠，同埋海鹽紅椒粉蛋白泡沫。 估唔到喺個前菜度有分子料理嘅嘢食呀!好驚喜! 帶子淡淡肉， 飽滿鮮甜， 個wasabi彈珠，望落似三文魚子，咬落
諗起之前留意到觀塘有間隱世法國菜，就去試下lunch啦，間餐廳位於亞太中心3樓，係一個旺中帶靜嘅地方。
坐低咗之後，望下餐牌，午餐嘅選擇唔算好多，但係都足以令我有選擇困難症，因為每一樣嘢食都好好食咁，最後我喺法式香蛋厚燒西班牙黑毛豬鞍，同埋西班牙紅蝦配自家制蝦油天使麵之間，選擇左前者， 因為我好好奇佢嗰個法式香蛋豬鞍 （HKD258），係點樣嘅整法呢?
經店員推介，而我又較肚餓，所以加錢要咗冰鎮荔枝浸蕃茄（HKD28），同埋北海道帶子配茴香檸檬蜂蜜汁 （HKD88）。
先嚟到嘅係沙樂美腸沙律， 沙律入面嘅醋係兩種陳年醋，而個細細一片粉紅色嘅係店家自製嘅櫻桃蘿蔔。個沙律菜好新鮮，每一塊都係爽脆㗎，醋嘅味道同份量啱啱好，再配埋少少酸嘅櫻桃蘿蔔， 非常醒胃。
之後嚟嘅係北海道帶子，好巨型嘅帶子呀! 用一個杯裝住好似食緊雪糕咁，帶子下面就係茴香檸檬蜂蜜汁，帶子上面就係好似分子料理咁嘅wasabi 彈珠，同埋海鹽紅椒粉蛋白泡沫。 估唔到喺個前菜度有分子料理嘅嘢食呀!好驚喜! 帶子淡淡肉， 飽滿鮮甜， 個wasabi彈珠，望落似三文魚子，咬落去都有魚子嘅質感，湧出嚟嘅味道係輕微嘅wasabi味，但又絕對唔會搶咗帶子嘅風頭。而個泡沫好輕盈，帶有少少鹹味， 味道相當特別， 唔怪得店員咁推介啦呢個菜式，尤其是午餐加配只需88蚊，相當抵食㗎。
下一度係西西里蕃茄湯配蒜蓉包。呢個湯係餐廳自己打㗎，用咗三種蕃茄，甜味係嚟至蕃茄天然嘅甜，而且其中一種蕃茄，仲特別甜㗎。 湯上面仲有燒過嘅北海道小貝柱， 同埋藜麥， 呢個湯蕃茄味相當濃郁， 個湯打得好細， 入口幼滑， 加埋有小貝柱嘅海鮮調味， 真係估唔到蕃茄湯都可以咁好飲! 同埋唔好忘記個蒜蓉包呀，呢度個蒜蓉包非常好食， 佢係整到好脆，但係又唔會好硬，入面麵包又帶鬆化， 蒜蓉味又香，真係同平時嗰啲蒜蓉包完全唔同! 通常嗰啲都係又硬又乾，仲會吉到個嘴㖭。真係好耐未試過飲湯嘅時候會嫌個麵包唔夠食呀 !
飲完個湯就到另一個前菜， 冰鎮荔枝蕃茄。 本身我諗住好心急咁攞個匙羹切開個蕃茄“畢“嚟食。 店員推介嘅食法就係“畢“起原粒蕃茄連薄荷葉放入口，唔好咬番茄住，然後飲曬個湯入口，再一次過咀嚼品嚐，原來咁樣食法就會先食到荔枝嘅味道，然後再有蕃茄味，到最後先至係薄荷葉嘅香味，充滿著層次感， 估唔到一個咁細嘅前菜會為我帶呢咁有趣嘅體驗!
食咗咁多個前菜終於嚟到主菜啦! 個豬鞍煎得超級超級靚呀! 配有南瓜香橙汁同黑醋松露汁，伴菜嘅係法式燉菜，例如有茄子同蘿蔔，仲有兩件 薯仔。 究竟廚師係點加個蛋漿喺個豬鞍上，而同時蛋同豬可以煎得咁靚嘅呢？就係廚藝嘅表現! 豬鞍厚切，煎得外脆內軟，而且非常juicy，加埋蛋香， 真係不得了!
（另外，店員有講呢隻係食橡果嘅西班牙黑毛豬，所以即使肉質有少少紅，都係正常嘅可以放心食用嘅）
個豬鞍無論就咁食，定係點汁都好正。 而個燉菜都整得好好食，雖然佢係一個伴菜，但係一啲都唔馬虎，而薯仔外面微脆，薯仔肉好香。 成碟無論主角豬鞍，定係伴菜，都好出色! 真係食得好滿足呀，我將全部嘢食都食到非常乾淨。
最後係飲品時間，我叫咗呢度嘅招牌shake shake 凍檸茶。呢度嘅凍檸茶，係由黃檸同青檸再加少少檸油調配嘅，係唔需要篤檸檬㗎! 真係好神奇呀! 飲到好香嘅檸檬茶味，而個檸檬味係比平時飲嘅有分別，感覺係更fresh，好特別，真係非一般嘅凍檸茶! 而且估唔到呢杯檸茶唔使加錢喎，好抵飲 。
呢餐食得好飽好滿足，食嘅每一樣嘢，對我嚟講都好新奇。餐廳使用我認識嘅食材，憑著廚師嘅創意、廚藝同埋用心，炮製出令我驚喜難忘嘅午餐 ! 令到我更加期待喺度食晚餐， 呢度都好適合 撐枱腳、慶祝紀念日或生日㗎，相信會有難忘嘅用餐體驗。
Post
