榮發粉麵專家 (Moved) New Location

是日放工，打番食完野早啲抖，第日要開早會briefing，索性叫個外賣仔一號，自行買番屋企開餐。呢間屬街坊御用粉麵，前後食過4次，小店隱蔽，店面好傳統，內裡無咩裝修，好平實既粉麵店，但每日每個時段都平均有8至9成入座率，此小店因幫襯過幾次，食物又抵又好味仲好大碗，份量多到食得好飽，實在想開心些牙一下。是晚叫左個墨魚丸幼麵、魚蛋河加個油菜打道回府同老姐開餐。因為係食左3分一先忽發奇想要推介呢間隔世小店，所以啲相係食緊時影，無左一啲餡，唔夠完整呈現份量多得很既真相。墨魚丸幼麵: 幼麵無皂水味，量很多，墨魚丸大大粒共有5粒，好彈牙，重點在於個湯，湯頭清香帶甜，啖啖麵配泥食，一絕，個湯會令人想清到底。魚蛋河: 湯河幼滑，入口好綿滑，河粉量多，魚蛋非常爽口彈牙（因為食左半，所以只影到淨底果兩粒魚彈)個油菜好抵，超大盒，菜量佔據成個外賣盒子(原本量好多，因已食緊半先影，所以欠完整性)，生菜好新鮮，無發現黃左或霉左，多爽口同鮮，蠔油亦無吝嗇，大大pat，正。整體來說，呢間隱世小店真正做到價廉物美，用心製造，實屬值得回頭番兜&兜之選，支持。