Lumen Cafe (Closed)

呢個地方如果唔係街坊真係好難發掘到，開頭以為戲院小食店應該得熱狗燒賣魚蛋，點知有家鄉銀針粉食，又有碗仔翅焗飯賣，忍唔住俾次機會佢，點知一食成日掛住佢！平時好難搵到有得食銀針粉既舖頭，佢個湯有蝦米冬菇豬油渣，仲可加埋菜甫好惹味，銀針粉襯埋個鮮味既湯，豬油既香，辣菜甫鹹脆，仲要用埋公雞碗成件事好夾又有風味！個花膠碗仔翅好足料，湯底有火腿鹹香，冬菇有咬口又滑，水準之作，不過舊花膠就無咩加分啦，其實不如唔好加我仲試左生菜魚肉，其實佢好有心魚肉無溝咁多粉，係好事，但就腥左d，同埋我食個日唔夠熱...仲有芝士咖喱飯又搞笑左少少加左蕃茄，個味酸酸地，食唔慣，但店主話係特登加～食得出佢地好有心機製作食物，食料有細節位，唔係粗製濫造～希望有更多人識欣賞啦！