La Vigne (Closed)

同朋友去大角嘴食飯，大角咀食車仔麵日本野打邊爐就多，第一次去食西餐。原本真係無乜期待，畢竟呢邊既西餐開頭係預左茶餐廳level。但食完不得了，用料新鮮，食物好高質，連擺碟都好靚。牛油果番茄沙律啲菜好新鮮，汁左啲芝麻醬係面，個比例好好，所以食落好fresh同開胃。自家制肉醬蟹肉意粉個意粉醬既蟹肉味真係好出，口感豐富濃郁但唔會漏，因為我好鍾意食辣，所以加左Tabasco，酸酸辣辣仲正，個醬好多，所以唔會乾，食極都好多蟹肉味包住啲意粉。唐揚雞翼個雞翼個皮好脆，啲內好juicy, 好好味😍香煎美國安格斯肉眼扒我地叫既係五成熟，煎得岩岩好。個肉好嫩好滑，牛扒好多汁。本身食扒係唔點汁既，但佢個汁調得好高級，唔識形容，就係個味唔係茶餐廳既紅酒汁，而係高級餐廳個種味。所以忍唔住係咁點。希望餐廳可以一直保持質素，我地會再黎。