AGE Cuisine Express (Moved) New Location

觀塘工廈就去得多，但原來對面海同樣有工廈美食😳。我同朋友喺太古行完街，唔想食商場連鎖店，上網一搵之下就見到有間叫「AGE Cuisine Express」嘅餐廳。我肯定自己無嚟過，但又對餐廳名有啲印象，最後俾我醒起佢係我舊公司提供到會午餐嘅承辦商！嗰陣日日食佢都覺得好正，原來真身喺呢度😝，成個感覺好得意，又似曾熟悉。餐廳主打西餐🍽，款式都算幾多。其實本身有諗過食Pizza，但佢成12吋兩條友未必食得晒。再加上今晚唔肚餓，所以只係叫咗一個主食搭兩個小食。慢煮半生M6和牛西冷配黑醋蜜糖芥未醬($138)，前菜賣相色彩繽紛🌈，廚師有花心思擺盤。主角西冷牛處理得唔錯，係預期中嘅半熟，肉身呈粉紅色，食落牛味都算濃，肉質唔韌🥩。18個月巴馬火腿伴芝麻菜沙律($104)，意式風乾火腿鹹香十足🥓，雖然比較細塊，但都能過吓口癮。火箭菜唔重青味，反而仲好似滲出蘋果甜香🍎。另外，伴菜仲有車厘茄同麵包脆糠等。豚肉蕃茄乾菠菜蕃茄忌廉汁扁意粉($118)，意粉幾大碟🍝，每條都掛滿醬汁，佢將蕃茄同忌廉混合為一，所以酸度同膩度都中和咗。扁意粉質感彈牙，加入菠菜同青瓜令口感更佳。🐷豚肉片係豬腩片，如果經煎香定必更香口。