金蘭花泰國菜 (Closed)

同個朋友去咗灣仔電腦城買野，啱啱佢屋企部電腦跪低咗，要即刻砌過部。搞咗一輪要等攞機，咁佢就話去食個lunch先啦。我無去開灣仔所以無乜主意，咁佢就話佢帶我去食泰國菜啦。要向金鐘方向行，其實又唔算好遠，慢行10分鐘啦。行遠少少唔緊要，好食就得啦。樓下門口好細，唔講真係唔知上面有泰國菜食。點咗小食拼盤、濕炒河粉、冬蔭功炒飯。小食拼盤有炸蝦餅、魚餅、春卷、炸雞翼。魚餅我一向唔多鍾意食，但係炸蝦餅就好好味。雞翼皮脆內軟，又夠香口，推介。冬蔭功炒飯味道唔錯，酸酸辣辣幾開胃，不過係比較油少少。