磯の水產

Open Now

Now Closed

本身打算找一間靜靜的餐廳，兩公婆食一餐平安夜晚餐，又諗唔到食乜好，最終決定了去食日本料理。一入到去，餐廳位置寬敞，唔算多人(相信係因為位置問題)，坐得幾舒服。打開餐牌，都幾多不同款式的料理，分別叫了炸魷魚圈、燒花魚一夜干、牛舌串燒、雞肉大蔥串燒、雞軟骨串燒、浜燒海鮮拼盤、刺身拼盤、壽司拼盤及抹茶汽水。炸魷魚圈不算好突出，不過上枱時都燒，以及都做到外脆內軟，尚算不俗。至於燒物方面，燒花魚一夜干的魚肉食落都幾滑，啲魚皮都脆，同埋都唔多骨，而三款串燒都唔太特別，不過牛舌就略嫌硬咗少少。到海鮮方面，浜燒海鮮拼盤由專人在面前主理(不過我鍾意自己燒多啲，雖然應該唔及專人燒得好，但勝在自己燒，好似有得玩咁)。這個拼盤的海鮮有大扇貝、鮑魚、蜆及蠔，而且都幾新鮮，食落時好嫩滑，同埋啲汁好香，好好味。刺身拼盤方面，件件都係厚切，而且好新鮮，唔錯。整體嚟講今餐的食物唔錯，再加上環境舒適，可以再試。