河內大娘越南餐廳 (Closed)

困咗咁耐，難得星期六放假梗係要岀去食晚飯喇。係尖沙咀行街經過呢間越南菜，坐得幾鬆動就入咗去坐了。餐牌都好多嘢食，唔係淨係得typical 嘅生牛肉河粉，價錢都非常合理。順化粉（$89）- 平時去越南餐廳多數都係食河粉,檬粉等等。呢個順化粉係牛展、豬手、豬紅米線，份量十足，牛展仲好腍添。再配上少少辣嘅湯底，好惹味。奧巴馬粉（$89）- 其實係檬粉配上魚露汁，酸酸地好開胃。有扎肉同用秘製醬汁醃嘅豬肉。扎肉好有口感，另外個豬肉都好入味，直頭好似岀面食嘅串燒烤豬肉咁。香茅豬扒三文治（$49）- 其實食完兩個麵都飽飽地，但我哋仲想試下個三文治。果然有驚喜喎！三文治烘到勁脆口，裡面餡料都勁豐富，有超厚身嘅香茅逐扒同蔬菜，必定要試。青檸梳打（$29）和蓮子龍眼冰（$39）- 蓮子龍眼冰真係好足料，不過我覺得有啲甜，所以就嗌咗酸酸嘅青檸梳打。