大同韓燒 (Closed)

一向好鍾意食韓燒嘅我，平時多數去開尖沙咀金巴利道或者係一啲大型連鎖店度食，今日偶然經開大角咀福全街嘅大同韓燒，見到門口餐牌寫住$159一位任食自助餐，都好似幾抵食就入去試試。店舖入面有十多張檯，位置寬敞舒服，又有卡位，唔會話好嘈，最重要係無咩油煙嗰度好。食物種類都算幾多，首先有多種韓國前菜選擇，例如：泡菜、芽菜、菠菜、小白菜等。以肉類黎講，豬、牛、羊、雞、鴨統統都有齊，仲有唔同嘅汁去醃製，有鹽燒、汁燒、蜜汁；海鮮方面有多春魚、青魚、青口、墨魚仔、八爪魚同埋好少有嘅小扇貝。燒嘅時候，職員提供燒烤紙鋪喺爐上面，既可保留肉汁，亦同時可以減少油煙同埋減低燒爐食物嘅情況。職員都有不時幫我地換燒烤紙添。整體食物味道方面都唔錯，肉類方面唔會 醃得太鹹，味道適中，亦唔會有太多味精，好明顯食到肉嘅原汁原味，特別一讚係個鹽燒五花肉，肥瘦適中，燒起黎好香，食嘅時候有油香，一食再食。雖然店內都有唔少飲品可以選擇，有綠茶、烏龍茶、巨峰提子汁、柑桔檸檬，仲有自家製無糖檸檬水同菊花茶(真係無糖架)，不過真係食左幾碟肉之後都唔係好覺口渴，證明佢真係無咩味精！佢仲有兩款湯提供，日式麵豉湯同蘿蔔花甲湯，個花甲湯真係好清甜