Video
Read full review
2011-10-26
2308 views
早前見到雜誌報導，知道大圍有位高人---梁虹光師傅，廿幾年來，獨沽一味，百寶雞，用其獨家刀法，去尖骨、起肥膏，務求大人食得健康，小朋友食得開心，淨係呢一份精神同心意，足以叫我專程去一試。百寶雞位於大圍積信街41號，唔難搵，舖面唔大，但貼滿報紙、雜誌嘅宣傳和報導，仲有前港督彭定康試食及與大班鄭經翰嘅合照，非常威水。今日係有備以來，所以一早已經打電話來預訂，因為梁師傅堅持即叫即斬，斬雞壹隻需時最快都要十二分鐘，如果有客人等候，隨時要敖上個多小時，所以梁師傅早已張貼聲明，提醒食客最好提前兩小時預訂，非常巴閉。我今日比預訂時間早咗到，眼見舖頭門已開，但空冇一人，便站在門外大叫一聲，因為舖頭嘅門口係有一趟半腰掩門攔著，所以我冇硬闖；有一把雄厚嘅聲音係舖頭後面嘅工場傳出來：「係咪訂咗雞？」「係。」跟著，就見到一個身穿白色工衣，紅色短褲嘅中年男子，由工場走出來，雖然真人比相中人老，亦比較瘦，但我肯定這名中年男子，就係梁虹光師傅，佢二話不說，隨手拿起工作枱上嘅廚師帽，往頭頂一笠，便走到砧板面前，一手拿起刀子，另一手拿起百寶雞，埋首開工，非常酷。根據報導，梁師傅只用120天大嘅農場活雞，每隻重約四斤，每
百寶雞位於大圍積信街41號，唔難搵，舖面唔大，但貼滿報紙、雜誌嘅宣傳和報導，仲有前港督彭定康試食及與大班鄭經翰嘅合照，非常威水。
今日係有備以來，所以一早已經打電話來預訂，因為梁師傅堅持即叫即斬，斬雞壹隻需時最快都要十二分鐘，如果有客人等候，隨時要敖上個多小時，所以梁師傅早已張貼聲明，提醒食客最好提前兩小時預訂，非常巴閉。
我今日比預訂時間早咗到，眼見舖頭門已開，但空冇一人，便站在門外大叫一聲，因為舖頭嘅門口係有一趟半腰掩門攔著，所以我冇硬闖；有一把雄厚嘅聲音係舖頭後面嘅工場傳出來：「係咪訂咗雞？」「係。」跟著，就見到一個身穿白色工衣，紅色短褲嘅中年男子，由工場走出來，雖然真人比相中人老，亦比較瘦，但我肯定這名中年男子，就係梁虹光師傅，佢二話不說，隨手拿起工作枱上嘅廚師帽，往頭頂一笠，便走到砧板面前，一手拿起刀子，另一手拿起百寶雞，埋首開工，非常酷。根據報導，梁師傅只用120天大嘅農場活雞，每隻重約四斤，每天新鮮運到，洗淨劏好後，浸入秘製滷水汁前，仲要係頸位開嗰小孔，等d滷水汁可以徹底滲入雞嘅內部，確保更加入味；至於嗰滷水汁就更加巴閉，梁師傅棄用花椒、八角，改用海味、瑤柱、沙薑、香葉和小茴等香料熬製而成，香味獨特，絕非坊間一般滷水汁可以媲美，非常正。
期間，見梁師傅埋頭苦幹，手起刀落，可以話快、狠、準，用其純熟嘅獨家刀法，將隻百寶雞煎皮拆骨；見梁師傅先將雞皮起出，細心地切除皮下肥膏，再起骨，跟著就用刀面拍鬆d雞肉，再塗上秘製百寶汁，才放入外賣盒；梁師傅之所以咁堅持佢嘅刀法，因為佢認為皮下肥膏係壞膽固醇，食咗無益，所以要切除；至於起尖骨，係因為要方便老人家和小朋友食用，以防佢哋被尖骨骾襯，非常細心。
除咗百寶雞 ($200一隻) 外，仲有BB乳鴿$30、雞腳$25、雞腎$30、雞肝$30、雞湯$5，如果唔想買全隻雞，仲可以買半隻$100，甚至飯盒都有，有百寶雞飯$28及BB乳鴿飯$35 (寫明係一隻乳鴿)，要脾就加$5，種類唔多，但非常詳細。
等了又等，足足等咗廿幾分鐘，終於見到我嗰盒百寶雞啦，仲有兩盒白飯，梁師傅強調係用金象香米煮，並非一般劣等米，只收$5一盒；見雞湯亦都係$5一盅，叫咗三盅，不過梁師傅話要等多幾分鐘，例湯唔係一早煲定，即搯即有咩？唔明，只見梁師傅係砧板後面，攪吓攪吓，咁我亦只好繼續耐心等待，非常耐。係呢個時候，適逢老闆娘---梁太剛啱返來，見我係度等，好主動咁同我傾吓計，原來佢哋早於1985年已經係大圍賣百寶雞，不過當時並唔係呢個舖位，係同一條街前幾個舖位，比依家嘅舖位仲要細，所以冇廚房，只有一個砧板、一個收銀柜咁大，當時，要去美林村嘅大牌檔，同人借廚房用，每當d雞煮好後，就用架手推車，推返來舖頭賣，又辛苦，又麻煩；及後，多咗d報紙、雜誌宣傳，亦多咗d口碑，生意自然做多咗，所以係1988年，就買咗依家嘅舖位，終於擁有自己嘅工場兼舖面，一直做到依家，非常長情。
閒話間，梁師傅亦有問我是否看到飲食男女嘅介紹而來，我直認不諱，我亦表示非常欣賞梁師傅嘅敬業樂業精神，所以專程造訪，梁師傅亦覺得報導詳盡，非常開心，仲攞埋報導入面所提及嘅百年妙藥俾我睇，佢話係爺爺留低俾佢，嗰樽入面係真空，所以d藥到依家仲保存得好好，係用來醫眼疾；梁太仲話明日下午會有亞洲電視嚟訪問，似乎佢哋對於傳媒嘅訪問係樂此不疲，非常健談。
湯亦都準備好了，梁太幫我打包好之後，梁師傅仲俾咗張錦囊我，臨行前，仲同我講：「包你一世唔會肚痛。」嗰張錦囊，其實係兩張A4紙，四面都寫滿字，係梁師傅嘅親筆字跡，大致嘅內容係話食咗d受污染或生冷食物而肚痛，最佳嘅治療方法，就係飲70oC熱滾水，因為有殺菌功能，字裡行間，亦表明咗梁師傅對政府嘅無能與不滿，我並非醫師，亦無花時間考究，未知確實與否，但聽落言之鑿鑿，頗有趣，亦不得不佩服梁師傅嘅偉大無私嘅精神；原來梁師傅嘅爺爺同爸爸都係中醫，所以梁師傅對醫術都略懂一二，閒來，梁師傅就會把佢所認識嘅或時下嘅話題、見解，手寫下來，再影印派俾街坊，希望造福人群，非常有抱負。
身負重任，要將梁師傅嘅精髓帶返公司與同事分享，所以我重踏油門，第一時間趕返公司開餐。湯，一人一盅，都頗大盅，其實一盅都足夠兩人用，賣相就一般，表面上有一層薄油，中間夾雜著幾點黑色，真的不吸引；呷了一口，味道不濃，亦不鹹，頗清，唔膩，的確係雞湯，而且冇味精，唔稱得上好好飲，但$5一碗真材實料嘅雞湯，比坊間嘅味精例湯，好飲百倍。
白飯，一般飯盒嘅份量，飯粒鮮明，唔會一嚿嚿，食了一啖，有淡淡嘅飯香，但我喜歡比較硬身，略嫌偏軟少少，但我兩位秘書，則非常欣賞，覺得很軟熟，亦好肯定係金象香米，因為佢哋屋企都係食金象米，哈哈。
至於主角百寶雞，份量十足，一個飯盒，裝得滿滿，雞皮呈啡色，香味一般，唔濃烈，正如雜誌所講，望落有d似豉油雞，不過顏色則比豉油雞略淺；二話不說，夾起一件雞脾肉，果然皮肉分離，沒有半點肥膏，一啖咬落去，十分嫩滑，味道香，且鮮甜，滷水汁嘅味道亦冇一般豉油雞咁鹹，可能由於梁師傅係每件雞都塗上百寶汁，所以夠香夠味；再試一件雞胸，當然冇雞脾咁滑，略嚡，但唔韌；至於雞背，雖然肉唔多，但雞味最濃郁；若嫌百寶汁味道唔夠，梁師傅亦隨雞附送一小盒百寶汁，可以蘸來吃，味道更加濃烈。
肥膏的確切除得十分乾淨，成盒雞，連一點肥膏都搵唔到；但骨，則並非完全起哂，雞背、雞胸等位置，仲有骨落地；雞皮起咗肥膏後，確實吸引，但見仲有少量雞毛；我並非想係雞蛋裡挑骨頭，只係想將所見所聞，如實與大家分享。平心而論，百寶雞係好食，比起一般燒味舖嘅雞，已經好好多，但未至於話非食不可，而且佢冇堂食，一定要外賣攞走，但係斬料加餸呢家嘢，通常都係要方便，係屋企附近就最理想，有幾多間，可以做到太子永合隆咁，d客係專程揸車嚟買外賣，就算有，百寶雞所處嘅位置，又唔方便客人泊車買走 (因為積信街路面狹窄，好容易阻塞交通)，所以係經營上，係有一定嘅難度。
我哋三個人，就將一隻雞，兩盒飯，三盅湯，一掃而清，合並$225，每人平均$75，唔算平，但非常飽，整頓飯，味香，但唔鹹，食完後，都唔覺口渴，難得；$200一隻雞，可能好多人都會覺得貴，但係街市賣一隻活雞，都要佰幾蚊啦，所以我覺得$200一隻新鮮雞並唔貴。
大家只要睇真d梁師傅嘅心機同誠意，就會覺得百寶雞係值得保存落去，要保存嘅，唔單止係食物本身，最重要嘅，係梁師傅嗰份心意，凡事都以客人為先，處處都為客人設想；依家，個個都口口聲聲話保育，但係往往都要到瀕臨危險嘅邊緣，先去做番d嘢，可以的話，大家都應該盡早出一分力，支持一吓本地文化。
Post
