小茶角 (啟豐商場) (Closed)

唔係朋友推介都唔知屯門碼頭依度開咗間咁高質嘅牛角包店！店鋪位於一個小商場度，座位只有幾張，所以多數都係做外賣生意，而對出就係屯門海濱長廊，都幾寫意架~店舖當然係主打牛角包，黎遠就聞到香噴噴嘅牛角包味，仲有唔少特式飲品同小食，買牛角包同飲品仲會送小食添，認真平靚正！海牛($28)，有吞拿魚+粟米，牛角包即叫即整，外層香脆，內裡鬆軟，中間夾住嘅吞拿魚多到瀉，撈埋粟米甜甜地又有口感。套餐附送嘅沙律都好比用心整嘅，有蕃茄仔同黑醋。芝士蘑菇牛($27)，有香濃嘅芝士同蘑菇，同牛角包融為一體，增添香滑嘅感覺~ 依個餐叫咗薯條，粗切，熱辣辣又脆！以為店鋪嘅飲品會好普通，點知令人驚喜萬分！黑糖珍珠鮮奶($35)，有黑糖紋，而珍珠粒粒分明，每啖都啜到滿滿嘅珍珠。而白桃貴妃烏龍茶($21)係夏日嘅必備之選，清新，解暑一流，仲有粒粒白桃肉~