鮨魂

Open Now

Now Closed

Item: Sushi Tamashi
Rating: 5
Author: 247hungrygirl

Sushi Tamashi

4.5

37 Reviews

Taste

Decor

Service

Hygiene

Value

3985

Tai Po

$401-800

Japanese Omakase

247hungrygirl

Level2

Read full review

本身請假諗住去大埔海濱公園玩一日，但係出現種種狀況搞到心情變差，所以決定食返餐好既黎補償返😤 搵到哩間位於大埔住宅區既隱世omakase，於是決定去試一試。我同男友都係揀左$650既lunch set，包含左茶碗蒸、4款刺身、一款燒魚料理、8貫壽司、手卷、湯同埋甜品，所有料理都係根據而家哩個季節既時令食材而制定，上菜次序亦有精心安排過，由淡味到濃味，食既過程會感受到師傅既用心，會根據我地既口味同進食時間黎作出調整，加上環境舒適、服務態度好、衛生亦做得好足，成個用餐體驗都好享受😌😌😌

*,.▤‥‥‥‥‥‥‥‥‥‥𝓵𝓮𝓽'𝓼 𝓼𝓽𝓪𝓻𝓽‥‥‥‥‥‥‥‥‥‥▤,.*
« $650 lunch set »
🍵 茶碗蒸
面頭有少少海帶汁，蛋嫩滑而且有鰹魚湯既香味，用料有冬菇、元貝、雞肉等等，屬正常發揮

🐟 真鯛刺身
味道鮮甜，肉質比較爽彈

🐟 鱈魚白子
經過同師傅了解之後原來係鱈魚既精巢。夾起黎滑潺潺，口感亦都好嫩滑而且超級creamy同濃稠，哩度菜未必個個都接受到，可能因為我唔係太肚餓既狀態下去食，所以佢既口感同埋濃郁既味道都令我覺得有啲漏🤔 但係我男朋友就好鍾意。睇得出師傅有刻意用柚子醬油配搭加上細蔥同辣蘿蔔蓉去平衡返白子既creaminess，整體哩講都係幾特別幾一道菜

🐟 秋刀魚刺身
宜家正正係秋刀魚既當造時間，每一啖除左係秋刀魚超級新鮮既魚香味之外仲有其他季節秋刀魚冇既油脂香味，同時口感比平時更加嫩滑，哩啲先係真正既“時令”秋刀魚，滿足感💯🤤 而且因為食材非常新鮮一啲腥味都冇，唔需要好似平時咁用薑蓉同蔥去癖腥，只需要用少少薑汁去吊味。

🐚 帶子
大大粒，味道非常鮮甜，帶子本身有喺醬油入面浸泡一段時間，燒過之後更加香口。用黎包住既紫菜非常爽脆，入口脆到即刻碎開，好滿足

🐟 燒吞拿魚下巴
面頭個一大片係魚皮，燒到超級脆口，食落似厚身既薯片咁，不過有少少幼骨同鱗片。因為係下巴位置，所以下面既肉有好豐富既膠質，同魚肉融為一體，口感綿滑又充滿魚油，啖啖魚香味。由於屬於比較重口味，師傅建議可以食完之後先再食旁邊既山桃，酸酸甜甜既味道用黎reset一下味蕾準備黎緊一系列既壽司

🍣 深海池魚壽司
爽口鮮甜，魚味清香

🍣 黑鯥魚
魚皮輕微炙燒過，肉質彈牙但味道比較淡，比浸炙燒味蓋過左魚既味道，哩款壽司相對上冇其他咁出色

🍣 鰤魚
魚味比上兩款壽司濃郁，師傅喺面頭用刀畫左啲交叉紋，介開魚既纖維，令口感變得好有質感

🍣 吞拿魚赤身
經過醬油浸過既吞拿魚令口感變得軟滑，少左吞拿魚本身既酸味，魚味更加濃郁

🍣 大吞拿魚腩
油脂極多而且分佈平均，有魚油香但又不失吞拿魚本身既魚味，唔係一味肥膩既味道

🍣 北海道馬糞海膽
海水同甘香味唔算話好濃郁，但係超級超級鮮甜！而且冇覺得好膩既感覺

🍣 牡丹蝦
有別於平時食到既蝦壽司，師傅將蝦膏經過處理再放上蝦刺身上面，味道非常香濃，蝦本身爽口鮮甜，咁既處理手法能夠一口就食曬全隻蝦既味道，非常豐富

🍣蔥吞拿魚腩手卷
哩個手卷我同男友都覺得不得了👍師傅用吞拿魚碎撈埋日本細蔥、京蔥、醃蘿蔔、醬油、白芝麻，外面包住既紫菜好香同好爽脆，每樣材料突出之餘又唔會蓋過左彼此既味道，同埋依然保留返個魚味作為個手卷既主角，味道同口感豐富得黎所有野都好well-balanced

🥚 玉子料理
哩款玉子既面頭係比較半流質既，而中間既口感就比較軟滑，最下面有煎香過，口感同味道都有啲似蛋糕，幾特別

🥣 舞茸菇清湯
湯清澈見底，但充滿菇既香味，冇其他濃味既配料或者材料，食完咁多款魚味香濃既料理，最後用一款清湯作結，感覺圓滿😌

🍦 蘋果雪葩
甜品口味亦都比較fresh，蘋果味一啲唔假而且好清香，甜左少少但可以接受

✍️ 𝓞𝓿𝓮𝓻𝓪𝓵𝓵 𝓻𝓪𝓽𝓲𝓷𝓰𝓼 ✍️
ᴛᴀsᴛᴇ ⇢ 𝟾.𝟻/𝟷𝟶
ᴅᴇ́ᴄᴏʀ ⇢ 𝟾/𝟷𝟶
sᴇʀᴠɪᴄᴇ ⇢ 𝟾/𝟷𝟶
ʜʏɢɪᴇɴᴇ ⇢ 𝟾/𝟷𝟶
ᴠᴀʟᴜᴇ ғᴏʀ $$ ⇢ 𝟽/𝟷𝟶
*,.▤‥‥‥‥‥‥‥‥‥‥‥‥‥‥‥‥‥‥‥‥‥‥‥‥‥‥‥‥▤,.*