深仔記

Open Now

Now Closed

好少去觀塘，最近喺附近上緊一個課程，每日都喺度捐窿捐罅搵好嘢食。見到深仔記門外有好大個餐牌，以為係平時工廈飯堂食頹飯，都冇乜特別期望。睇吓個餐牌，咦！又幾有驚喜喎，佢面類唔單止有雲吞麵嗰啲港式面當必備嘅配菜，仲有新鮮魷魚、肥餓腸等等。食物方便好有驚喜，首先黑柏葉嘅份量好多，你見到足足鋪滿成碗面。黑柏葉切成幼條，比較容易入口，而且烚得啱啱好，唔會熟得滯過軔，有咬口得嚟唔會𡁻唔爛。麵質同埋湯底都係有傳統麵家嘅水準，老實講我覺得麵質拍得住「奀X記」。入口係爽口嘅，唔會淋Patpat亦唔會硬到𡁻唔開。麵嘅梘水味唔係好重，亦夠彈牙。湯底有淡淡大地魚湯味，即使我碗面入邊已經有好多薑蔥，但係依然食得出湯底有魚味，而且唔會比鹼水蓋過湯底嘅味道。隨麵附上辣椒豉油，唔算好辣但幾細心，俾你配黑柏葉去食。而且價錢都算公道，我叫嘅薑蔥黑柏葉麵只係$43 ，好多時出邊黑柏葉都唔可以直接配麵，要單點價錢就會比較貴。加$10去買凍檸茶，買單都只係53 ，算幾抵食。食品質素整體都好高質，座位都舒服因為我有梳化位，但店中間嘅圓檯就要坐膠凳，可能無咁舒適。另外我叫嘅少甜凍檸茶都幾甜，好似無特別做到少甜，希望下次可以改善。